رجع ابن آدم للعدم قلت: ياه
تراب بيحيا.. وحي بيصير تراب
الأصل هو الموت ولاّ الحياه؟
عجبي
*******
ضريح رخام فيه السعيد اندفن
وحفره فيها الشريد من غير كفن
مرّيت عليهم.. قلت ياللعجب
الاتنين ريحتهم لها نفس العفن
عجبي
*******
ياما صادفت صحاب وماصاحبتهمش
وكاسات خمور وشراب وما شربتهمش
أندم على الفرص اللي انا سبتهم
ولاّ على الفرص اللي ما سبتهمش
عجبي
*******
الكون ده كيف موجود من غير حدود
وفيه عقارب ليه وتعابين ودود
ده ياما فيه سؤالات من غير ردود
عجبي
*******
أنا شاب لكن عمري ألف عام
وحيد لكن بين ضلوعي زحام
خايف ولكن خوفي مني أنا
أخرس ولكن قلبي مليان كلام
عجبي
*******
ياباب يامقفول.. إمتى الدخول
صبرت ياما واللي يصبر ينول
دقيت سنين.. والرد يرجع لي: مين؟
لو كنت عارف مين أنا كنت أقول
عجبي
*******
أحب أعيش ولو في الغابات
أصحى كما ولدتني أمي وابات
طائر.. حيوان.. حشرة.. بشر.. بس أعيش
محلا الحياة.. حتى في هيئة نبات
عجبي
*******
سهير ليالي وياما لفيت وطفت
و فـ ليه راجع في الضلام قمت شفت
الخوف.. كأنه كلب سد الطريق
و كنت عاوز أقتله.. بس خفت
عجبي
***
شربت كاس واتنين وخامس عشر
صاحبت ناس مـ الخمرة ترجع وحوش
وصاحبت ناس مـ الخمرة ترجع بشر
عجبي
*******
ليه يا حبيبتي ما بينّا دايما سفر
ده البعد ذنب كبير لا يغتفر
ليه يا حبيبتي ما بينّا دايما بحور
أعدّي بحر.. ألاقي غيره اتحفر
عجبي
*******
__________________
احتمِ بمظلة التفاؤل.. قبل أن يبللك الحزن فالحياة أحقر من أن نسهر.. نقلق.. نبكي و نحزن عليها
صدّقني.. لا شيء يستحق
موضوع: رباعيات صلاح جاهين 
الأحد مارس 30 2008, 20:54
